பல்கலைக்கழக முறைமையில் ஏற்படும் தாமதம் தடுக்கப்பட்டு, குறித்த காலத்திற்குள் மாணவர்கள் கல்வியை முடிப்பதற்கான சந்தர்ப்பம் வழங்கப்படும் என ஜனாதிபதி தெரிவித்துள்ளார்.
இலங்கைப் பல்கலைக்கழக முறைமையில் கல்வியை ஆரம்பிக்கும் கால தாமதம் தவிர்க்கப்பட்டு மாணவர்கள் குறித்த காலத்திற்குள் கல்வியை முடிப்பதற்கு வாய்ப்பு வழங்கப்படும் என ஜனாதிபதி ரணில் விக்கிரமசிங்க தெரிவித்தார்.
கொழும்பு றோயல் கல்லூரியின் மாணவர் தலைவர்களுடன் நேற்று (22) ஜனாதிபதி அலுவலகத்தில் இடம்பெற்ற சந்திப்பிலேயே ஜனாதிபதி இதனைக் குறிப்பிட்டுள்ளார்.
இந்நிகழ்வில் றோயல் கல்லூரியின் பிரதம மாணவர் தலைவி கவீஷா ரத்நாயக்க தலைமையில் மாணவர் தலைவர் சபை மாணவர்கள் கலந்துகொண்டனர்.
கல்லூரியின் விவகாரங்கள் மற்றும் நாட்டின் கல்வித்துறையின் நிலைமைகள் குறித்து இங்கு கலந்துரையாடப்பட்டதுடன், கல்வித்துறையின் முன்னேற்றத்திற்காக அரசாங்கம் எடுத்துள்ள நடவடிக்கைகள் குறித்து மாணவர்கள் எழுப்பிய கேள்விகளுக்கு ஜனாதிபதி பதிலளித்தார்.
இங்கு பல்கலைக்கழக கல்வி குறித்து ஜனாதிபதி மாணவர்களிடம் கேட்டறிந்ததோடு, வெளிநாட்டு உயர்கல்வியில் பட்டம் பெற எடுக்கும் நேரத்திற்கும் உள்ளூர் பல்கலைக்கழகத்தில் எடுக்கும் நேரத்திற்கும் அதிக வித்தியாசம் இருப்பதாக மாணவர்கள் ஜனாதிபதியிடம் தெரிவித்தனர்.
அதனை ஏற்றுக்கொண்ட ஜனாதிபதி, அதற்கான முறையான தீர்வு விரைவில் நடைமுறைப்படுத்தப்படும் எனத் தெரிவித்தார். அத்துடன், வெளிநாட்டுக் கல்வியை விட உள்நாட்டுப் பல்கலைக்கழகத்தின் கல்வியின் பெறுமதியை வலியுறுத்திய ஜனாதிபதி ரணில் விக்கிரமசிங்க, பாடசாலைக் கல்வியை முடித்து உயர்கல்விக்கு தகுதி பெற்ற மாணவர்களின் கல்வி வாய்ப்புகளை விரிவுபடுத்த அரசாங்கம் பல நடவடிக்கைகளை எடுத்துள்ளதாகவும், மேலும் பல புதிய பல்கலைக்கழகங்கள் குருநாகல், மட்டக்களப்பு உள்ளிட்டவை விரைவில் திறக்கப்படும்.
கொழும்பு பல்கலைக்கழகத்தின் பொறியியல் பீடத்தை தனியான வளாகமாக மாற்றுவதுடன், தேசிய வர்த்தக முகாமைத்துவ பாடசாலை (NSBM) மற்றும் இலங்கை தகவல் தொழில்நுட்ப நிறுவகம் (SLIIT) ஆகியவற்றுக்கு தேசிய பல்கலைக்கழக அந்தஸ்து வழங்கப்படும் என்றும் ஜனாதிபதி குறிப்பிட்டார். .
பல்கலைக்கழக துன்புறுத்தல்கள் குறித்து மாணவர்களிடம் கேட்டறிந்த ஜனாதிபதி, றோயல் கல்லூரி, தர்ஸ்டன் கல்லூரி, ஆனந்தா கல்லூரி, டி.எஸ். சேனநாயக்கா வித்தியாலயம் போன்ற கொழும்பு பாடசாலைகளிலிருந்து வருடாந்தம் அதிகளவான மாணவர்கள் பல்கலைக்கழகங்களுக்கு உள்வாங்கப்படுவதாக கூறப்படுகின்ற போதிலும், புதிய மாணவர் தொல்லைகள் இடம்பெறும் போது அவர்கள் அது தொடர்பில் மௌனமாக இருப்பதையே காணமுடிகிறது.
பகிடிவதைகளை தடுக்கும் கடமை பாடசாலைகளுக்கு இருப்பதாகவும் அதற்காக பாடசாலை அதிபர்கள் பாடசாலை நாட்களில் இருந்தே பொறுப்பான சில பணிகளை செய்ய முடியும் எனவும் ஜனாதிபதி சுட்டிக்காட்டினார்.
பல்கலைக்கழகக் கல்வி மிகவும் அழகானது எனவும், பகிடிவதையால் உடல் மற்றும் மன உளைச்சலுக்கு உள்ளாகும் மாணவர்களின் நிலைமை அதிகரித்துள்ளதாகக் குறிப்பிட்ட ஜனாதிபதி, அதற்கான தீர்வுகளை முன்வைக்க தாம் செயற்பட்டு வருவதாகவும் வலியுறுத்தினார்.
றோயல் கல்லூரியின் வளர்ச்சிக்காகவும் கல்லூரியின் நற்பெயருக்காகவும் மாணவர் தலைவர் சபை ஆற்றிய பங்கை ஜனாதிபதி ரணில் விக்கிரமசிங்க பாராட்டினார்.
இந்த நிகழ்வில் ஜனாதிபதியின் தேசிய பாதுகாப்பு தொடர்பான சிரேஷ்ட ஆலோசகரும் ஜனாதிபதியின் தலைமை அதிகாரியுமான திரு.சாகல ரத்நாயக்கவும் கலந்துகொண்டார்.
ஜனாதிபதி ஊடகப் பிரிவு
https://sinhala.teachmore.lk/%e0%b7%80%e0%b7%92%e0%b7%81%e0%b7%8a%e0%b7%80%e0%b7%80%e0%b7%92%e0%b6%af%e0%b7%8a%e0%b6%ba%e0%b7%8f%e0%b6%bd-%e0%b6%b4%e0%b6%af%e0%b7%8a%e0%b6%b0%e0%b6%ad%e0%b7%92%e0%b6%ba%e0%b7%9a-%e0%b6%b4/
